أبوذيات  

أبوذية (003)

حامد كعيد الجبوري
hamid_gaid2000@yahoo.com

حبيبي لا مثل كلبك وهم بيك
تمنيت اللذي بيه وهم بيك
مثل يوسف تهم بيه وهم بيك
شبكته وما نزل برهان بيه
******

آنه الخابُطك بيدي وصفاك
وحرت شنطيك من ميزه وصفاك
حبيبي شوصف أعيونك شصف فاك
جنه ونار جامعهن سويه
*****

أفوج أبين ذرعانك والنهود
وشمك مية ألف شمه ولا أنهود
أهد الدنيه لوصالك ولا أنهود
أبحبل مجتوف والعكده خفيه
******

سليت أبنار هجرانك ولا لام
ولاني طيب أصوابي ولا لام
لا مليت من شوكك ولا لام
دخيلك خشن أكليبي عليه
********

كضيت العمر وياك جدي
أحشم الروح كلما أتهيد جدي
توكفلي أبصلافه أتكول جدي
عُكب ما شيبت تتمزهَد عليه
*******

وحك اللي بعث للناس مرسال
نبع صافي زلال الروح مُر سال
ما تفكد عليلك ليش مر سال
رميت وتنظر أتصيب الرميه
******

تصد ويا شرع أفتت قبلتك
حلال أتمرعد أبروحي قبلتك
مدري أبيا سنه أبطيفي قبلتك
طعمها أبشفتي حد للمنيه

 

Google


    في بنت الرافدينفي الويب

 


 
 
 
 
 
 

© حقوق الطبع و النشر محفوظة لموقع بنت الرافدين
Copyright © 2000 bentalrafedain web site. All rights reserved.
  info@bentalrafedain.com