القصيدة

جبل هذا العراق

الشيخ حمزة ناصر الخفاجي / بابل

جبل هذا العراق وقمته بغداد

                               بخيوط الشمس تتمعجل السمره

غزاله عيونهه ما ترحم الصياد

                               لوصدت شعاع وتسحر النظره

زولية ورد لو مر عليها الريح

                               ياخذ من عطرها اينسم ابعطره

الزاير من يطبهه ايشوف جنه عاد

                               والشايل مرض ايوب هم يبره

دجلة من تنام يسكنلها الروج

                               ولو غاب الكمر وجناتهه الكمره

والكاظم يحج اشما راد

                               بالاعظم يطوف ويعتمر عمره

الكرخ ويه الرصافة الفخر والامجاد

                               شدة ورد تزهي ابطيبة العشره

بظلمة ليل لنهه ميسرة بغداد

                               وعيون العزيزة ادموعها عبره

ضواري الكطعتهه وهيه بيه الروح

                               جن حراسها نامو حدر صخره

بس الجلد ظلت والعظم مصيوب

                               واليجبر هشمه ابحجة ايجبره

عمتهه المكحلة من كثر اليكحلون

                               وشحده اليكحل الميل من جره

الملاليح اكثروا والروج يلطم روج

                               كلمن رايته ودستورهه حدره

كبل لومات شايب تنذهله الناس

                               وموكب للجنازة يوصله لكبره

واليوم الضحايه تموت بالميات

                               واليشيع وحيد وحاير بامره

المن نشتكي وقاضينه هل محتار

                               واوراق القضيه اماجلة لبكره

جم بكره اليمر وهاي ثلث سنين

                               نصبر والصبر مل وجزع صبره

البحر جدامنه ومصارع الحيتان

                               واحنه اعله الجرف ومقفلة العبره

 

Google


 في بنت الرافدينفي الويب

 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 

© حقوق الطبع و النشر محفوظة لموقع بنت الرافدين
Copyright © 2000 bentalrafedain web site. All rights reserved.
 info@bentalrafedain.com