سالم الوطن

خلدون جاويد

سالم الوطن من نار الأحقادْ

من غدر المِليشيا وحكم الأوغادْ

تفرح كل مدينة ْ

شما چانتْ حزينة ْ

بصرة وكربلا ونينوى وبغدادْ

 

آشورْ وعربْ ، كُرْدْ وتركمانْ

مثل جوگة بلابلْ وسط بستانْ

مثل قرص الشمس باطياف والوانْ

يضفر بالمحبة باقة اورادْ .

  

سالم الوطن وابن الشعب ثارْ

كسر خشم الارهاب وداس عَلْ نارْ

على اعداء الوطن السيوف تندارْ

وكل نار الْ تِمِس ْ بستانّه ارمادْ

  

سالم الوطن والإيد بالإيدْ

التضامن والصداقة فرحة العيدْ

حزب واحد بعد ياشعب منريدْ

بحب الناس كلهه اتزول الأحقادْ

  

سالم ياوطن يالمستحيل انساكْ

سويد الماي لو دربك اروح اوياكْ

بسابع روح اضحّيلك انا وافداكْ

اروحن نذر لاجلك ، طالب امرادْ

 

سالم  ياوطن اتزول احزانكْ

ويعود الگمر والنجم لاحضانكْ

الله ايصون كلمن حبّك وصانكْ

وعليه عيد الفرح كل عام ينعادْ

 

سالم غانم وعالي وطنهْ

إنشودة سلام اليوم غنّهْ

محله الدار من تلتم باهلنه

وتگطر بالوفه وبالخير بغدادْ

 

سالم يا وطنّه ، يا أَبو الطيْبَهْ

 وتسلم دوم بغداد الحبيبهْ

بعد ما نلتجي لدوله غريبهْ

نرجع بالسلامه لأجمل بلادْ

 

سالم ياوطن يلدربك الأفراحْ

وهل هلال سعدك والورد فاحْ

طاح الغيم الاسود همك انزاح

وأيام المضت مُرّه ومتنعادْ

سالم الوطن من نار الأحقادْ

 ******