القصيدة

ساكت ياوطن

ضرغام العراقي / ديوانية الفرات العذب

ساكت ياوطن والحركَه تاكل بيك
لو خايف بعد والسكته من خوفك

من حرب الحرب جبنه العمر وياك
من اكل الجثث ما ينترس جوفك

مابيك الذنب كَول الذنب چا وين
يمكن نعتذر لو نفهم ظروفك

چنت المدرسه وبيك الشعب طلاب
وبس دك الجرس شو فارغه صفوفك

تقبل ياوطن يرضيك هذا الحال
ناسك للأسف تتراكض تعوفك

وتقبل ياوطن شبانك الحلوين
تتغرب غصب تحرمهه من شوفك

جاوب لا تظل ساكت يبو الثورات
عشرينك بعدهه اتعيش بطيوفك

من طور الحزن ملينه ما ملّيت
چاطور الفرح ما تعزف دفوفك

من ريد الفرح بس كون ريدك سيف
موعيب بغمد وتنامهه اسيوفك

بايكَ ما صرت ما خاف من جلاد
مو هذا شعارك هذه معزوفك

چاشنهو التغير يا عراق شبيك
ثار حسين ذمه ابشيبة ازلوفك

 

شعبك من عطش رادك مثل عباس

يعني حسين شعبك وارضه اله اطفوفك

 

لكن للأسف ماكَوا مثل عباس

ومانوصل عشر ياحسين لحروفك

نعتب ياوطن من حبنه الك والله
شفناكم نهر عطشان بجروفك

ومن نصحك لأن صدكَنه كلنه اخطاء
يا بيت الكرم نتسمّه بضيوفك

أصفن ويه نفسك راح تعرف زين
لو ما تنتفض چاضاع معروفك


عذراً يا وطن بس ثور حتى نثور

لوتكَظي العمر والقيد بچفوفك

ملاحظه:

مانقصدوطن يعني الوطن بالذات

بعيون البشر هم موطن نشوفك

 

Google


 في بنت الرافدينفي الويب

 
 
 
 
 
 
 
 
 
 
 
 
 
 
 
 
 
 
 
 
 

© حقوق الطبع و النشر محفوظة لموقع بنت الرافدين
Copyright © 2000 bentalrafedain web site. All rights reserved.
 info@bentalrafedain.com