القصيدة

عتاب الى من لا يهمهم الأمر

 

حسين الفنهراوي

 alfanhrawee@yahoo.com

الثقافة براء من المثقف الذي لايحمل هموم شعبه...

 دائما ما أسئل هذا السؤال (لعد وين إنته؟ وين كتاباتك؟ لازم بديت تخاف!! لوسكتوك بالفلوس؟ موجنت خوش تكتب!!!..)

وأنا أقول لهم .....

أعاتبمن تكلولي العتب زين .. جيبو اليستحي حته أعاتب

تظنوني أخافن والله ماخاف .. تدروني أكيّف عالطلايب

تدروني قلم باشط وبتار.. والباطل لون خويه أحارب

أدوّر عالفساد ووين ماجان .. ماجامل وأكتب مالي صاحب

أنه الموجب وموجب أبقه للدوم..ولأجل منصب أبد ماصير سالب

ولا أمسح جتاف لهذا ولذاك..قنوع وغير حقي ما أطالب

شأكتب؟ موكتبنه هواي وهواي..ماشفنه رجل كال أرد أحاسب

نتنطّر تفض ملينه والله.. موعدنه الفرج والفرج غايب

إظهر "بايدن" مو ملّت الناس ..يريدونك تجي توزع المناصب

خمستشهر وهمّه عراك بعراك.. وبالأعلام ظهرولك حبايب

كاذب كلمن العلّك شعارات..  والهمّه الوطن صدكوني كاذب

ودليلي هالوطن ينذبح كل يوم.. وهمّه مكبسلين بـ"أبو الحاجب"

مايدرون شنهو الكاعد يصير..بس يدرون يمته يجي الراتب

مايدرون جوع وقتل وإرهاب..والموت إيحصد جم إبن خايب

الفقره تدور فلوس ماعون .. وتعييناتهم بس للكرايب

ومناصبهم صفت لفلان وفلان .. وسفارات الدول بس للحبايب

شأكتب؟ لاتكلي إكتب النوب..كتبنه هواي بس منهو اليجاوب

كتبنه إعله الفساد وزاد قاطات..وحصدنه بالفساد أعلى المراتب

وكتبنه إعله المزور رشّح ردود..ولو مالطف ربك صار نائب

ياربي بجاه العنده كل جاه .. نريد وبالعجل يظهر الغايب

دخيلك يامحمد نبي الأسلام .. دخيلك ياعلي بن أبي طالب

نريد نشوف ميزان العدل يوم .. ياهو اليستلمنه يحطنه جانب

وعلينه إحنه إنتحمّل جوع وإرهاب .. والهم باقيه باقي الجوانب

ياشارب نعاتب والقيم وين؟.. ومنهو العنده قيمه لهلشوارب

غيره إعله الوطن ماظلت بنوب .. هذا إلمن فرات ودجله شارب

بلبنان ومصر شيدو عمارات..وولد الخايبه تنام بخرايب

بوكت الأصوات كلهه تجدّي أصوات .. وكل واحد يكلّك آني صاحب

ومن ياخذ أصواتك عنك يطير.. نساك ومادره شماكل ششارب

نصبر والصبر موعدنه كل يوم .. وإحنه ويه الصبر عدنه تجارب

أعاتبمن تكلولي العتب زين .. جيبو اليستحي حته أعاتب

وين اليستحي حته نعاتب.. وين اليستحي حته نعاتب

Google


 في بنت الرافدينفي الويب

 
 
 
 
 
 
 
 
 
 
 
 
 
 
 
 
 
 
 
 
 

© حقوق الطبع و النشر محفوظة لموقع بنت الرافدين
Copyright © 2000 bentalrafedain web site. All rights reserved.
 info@bentalrafedain.com