القصيدة

منيات عراقي

محمد الكعبي / كربلاء

kaabee_55@yahoo.com 

كلي تحلم ... كتله أي بويه العراق
أحلم أبدنيه جديده ...
تفيض بالحب بالتسامح .. نختصر بيهه الأماني
والمسافات البعيده..
ياعراق ... أحلم أبليلك نبات ...
وبلف ليله وليله ... ترجع (شهرزادك) .. تقره لعيونك قصيده
على شعبي .... الغرك بالدم
ومارضه الجف المذله أتلووح أيده ...!!
آنه أحلم نلتم ... ويلتم شملنه ...
كلب واحد ... صوت واحد ... أيد وحده
نرسم الدنيه الجديده ... ياعراق
وراح أسولفلك بعد ... عن ... ألأريده ... وما أريده
آنه أريدن .... ليلك يلولي على أعيون اليتامه .. يكلهه نامي ..
وآنه أريدن ... مايك الطاهر يفيض .. ويغسل أكلوب الرفاكه ..
وعلـــــــه كل شفت حزن ... يطبع سلامي ...
وماأريدن ... دوله حره أفتقد بيهه أحترامي
وماأريدن ... شعب نص من عنده شرطي
ومنه نص ثاني حرامي
وماأريدن ... أي حكومة أتعامل أبناء الشعب مثل العبيد
وبالمقابل ... ماأريدن ... شعب ما يدري أشيريد ؟؟
شعب ويه الريح يفتر ... أيودي (لحسين) الرسايل !!
أومن يجيه (أحسين) ... يركع .. ينحني ... يبايع (يزيد)!!
وماأريدن ... أي سياسي .. أيبيع أرضه .. أوعرضه .. من أجل الكراسي
بس أريدن ... كون راسي أيشيل شعبي ..!!
أومن أحط شعبي أعله راسي .. يشيل راسي !!
وكون ألغيهه الكراسي .. ألجابت الشعبي المأسي
وخل نعيش بلا كراسي ... 
أنه أريد ... أمن الجبل نبني العراق ..
ومن كصب (هور الجبايش) نصنع الكرسي الرئاسي
وماأريدن ... فوضوية ... ولاتقاليد .. ومزاعم عنصرية .. وطائفية
الوطن والدين واحد ... خدمته واجب عليك ... وبالمقابل خدمته واجب عليه
وما أريدن ... أي سياسي .. عاف هذا الوطن ينزف
ومن رجع يحجيلي عن الوطنية
وماأريدن ... بعد خوذه ... ولانطاق ... وزمزميه !!!
ولاتحيه لضابط بخصره (كلبجه)
من يمرني يشيل خشمه ... وآنه أرفعله أديه
بس أريد أمن الحكومة ... هاي إذا صارت حكومة وطنية ؟؟!
تكتب أبدستورهه .. هاي الوصيه
(أيها الشعب العراق ... أيها الأبن العراقي ...)
من تمر بأي رصيف ... وتلكه (أم) ... أمبصطه (أبجمبر جكاير)
تنحني وتاخذ تحيه ....
 لآن هاي أكبر قضيه 
وماأريدن ... أي سياسي أتصير مأساة الوطن عنده وظيفه
علفظائيات يطلع .. يحجي بسم الشعب .. وينظر أبكيفه
(يجب علشعب العراقي ... أن يقاوم ... أويجب علشعب العراقي .. أن يحاكم )
أوهوه كضه أسنين عمره كاعد أبنص بيت الابيض ... كاعد أبلندن يساوم
... أومادره شلون الشعب خلص حياته وماعرف بيش الشعب داوه نزيفه
بالحزن ... بالجوع ... بالموت الجماعي ...
بالعذاب المايشيله ألساني لو حاولت أضيفه 
بالنظام ألا نظام ... ألماصرت مره حليفه
ألى كل واحد عراقي ... أمريكي صار
 أوهوه أبن هذا العراق ألباكو ... أمنعيونه طيفه
ألى كل واحد عراقي ... أمريكي صار
وهو أبن هذا العراق ألما يريد أبكاعه تنعاد السقيفه  ..
نكله أوكف ... عمي أوكف .. بعد مانحترم سلطان وخليفه
وبعد مانرضه (الشمر) يحكم شعبنه ... أويحد بركاب الزلم يوميه سيفه
أوبعد مانرضه الغريب .... يزاحم أبن البلد علّكمه الشريفه
كافي بس أمن التزاحم ... والسياسات العنيفه
كافي بس أمن الحرب ... والله تعبنه ...
كافي خل نجمع شملنه
كافي خل نبني وطنه
كافي خنصدر نفطنه
أو... ورد نستورد بداله
 ليش نستورد قذيفه
ليش نستورد قذيفه ....
أوهاي .... حريه سخيفه
 

 

Google


 في بنت الرافدينفي الويب

 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 

© حقوق الطبع و النشر محفوظة لموقع بنت الرافدين
Copyright © 2000 bentalrafedain web site. All rights reserved.
 info@bentalrafedain.com