شفت وجه العراق موّرد و مسرور

و بكل جزء منّه تشع محبه و نور

و شفت الجبل شايل على چفوفه زهور

طرزها بوفه و طشها بثنايا الهور

شفت كردي حضن شيعي على ملح الفاو

شفت السنّي گاعد للفرح ناطور

و الصابئي محزّم يرگص و فرحان

و بحلگه سوالف من شعب آشور

طفح ماي الفرح ما يسد فيضه ارهاب

و رد جيش الارهاب مصوّب و مكسور

حتى البور خضّر طگ محبه و طيب

و لاچن عاش عمره بكل صفات البور

احس العيد يمشي بكل الولايات

مد روحه علينا و ضم حزن عاشور

يوزّع عل الاطفال ملبّس و بسمات

و يحط بعيونهم كحل الفرح و عطور

ظل الذيب يعوي و من يخاف الذيب ؟

اذا ظهره انكسر و بحلگه سن منخور

صفحات الشرف ميثاق للاجيال

مكتوبه بدماء اللي وگع منذور

بكل كلمه شهيد انتصب حق و خير

و سد باب الاذيه و حفر گبر الجور

بكل كلمه مجاهد ما رضى على الظيم

حط روحه على چفه و رافگ الشاجور

بكل كلمه امرأه ضاگت مرار العيش

بس حاطت شرفها بألف سور و سور

بكل كلمه حقوق ترد لاهلها ردود

لا غادر تعلّى و لا شخص مغدور

بستان الشعب اثمر ضوه على الناس

و من ماي الورد ظل ينهل الناعور

يا طعم النصر ابقى بلهاتي سنين

تراني من الزغر ما كنت احس منصور

و دگ بيبان اهلنا و لا تعگّب باب

و بضحكه چبيره انطيهم الدستور