حبيبة وعيد آذار

( شعر شعبي عراقي )

حبيبة وعيد  وشوية نواعي

حديقة شوگ مابين المنافي

وشفت غابة نخل تحضن سماوات

ومدينتنا السماوة .. عطش وفرات

ياعيني هلي وين اليحبون

بلاية وداع  مثل نجمة يغيبون

وأدورك ياحبيبي بين الأشواگ

ممنوعة علينا الضحكة ياعراگ

خليني بجناحك ريش ناعم

وأضم كل الهوى يا ثغر باسم

تسألني شأجاوب شگد احبك

وأنا الدنيا تضيع وأبقى أودك

حبيبي انت حبيبي شمس آذار

عطشان الدفو من حلو الأشعار

ضيّك لو تطشر يوسع البيت

حديقة وعيد  والطعم جكليت

گلي لياوكت يبقى انتظاري

وانا بواهس عطش غيمة براري