زخي .. زخي
كاظم ال مبارك الوائلي
زخي...
... زخي
شكثر عندچ غيظ زخي
وبية بيسي بحبل همّچ لا ترخّي
او مّشي ظعن الشوگ
وِحِدي و لا تّنوخي
وحيل زخي...
او بية بيسّي او وشّلي غيظچ
خلي ابو طريبيش ينزل
لا تورجينة اعلى جرحچ
ذبي ثوب الأسوَد ولبسي البياض
و فكي حزنچ
لا تحزنين آني اشگ زيجي
وبد ما أقبل اتشگين زيجچ
فرغي همچ...
ونّي حيل
اطرب آني ابلحن ونّچ
فطري مو كافي الصيام
هاچ من شوغات روحي وفكّي ريجچ
حيل زخي...
وأوجري بچويات گلبي ولا يهمچ
بية بيّسي برهدنة
واحسبهة رحمة الچوّية منچ
انتي تدرين
اني مو صبيرة وصبر
لا تگطعين الوصل
بيني وبينچ
ولو گَلَب شعواط ريحچ
عندي احلى امن المسچ
وبلهفة اشمّچ
مري بية
وأفرش أفادي غليچة وزين اضيفچ
لا تردين اليمد ايدة
او يريد اينول ودّچ
ونتي ام الغير للايذ ابسدّچ
حيل زخي....
او خَل تخضّر گاع
ديرتنة اعلى حسّچ
لا تبخلين اعلى بستان
المحبة او كثري خيرچ
رگصي ايام الربيع
وخَل ِتفتح وردته بدگات نبضچ
ونتي محبوبة وطنة أو من عمت
عين اليضدّچ
حيل زخي....
وهزي كاروك الرعيد
او فزيزيني بحرگة اصرخي
طبع بيچ الجود يتباهة ابدلالة
أوموش منخي
زخي
زخي
شكثر عندچ
غيظ زخي
...
...
أبو طريبيش: فقاعات على
الأرض ناجمة من غزارة المطر
شعواط: الرائحة الكريهة
التي تنبعث نتيجة احتراق مادة بلاستيكية
غليچة:السجادة التي
تفرش في دواوين العراق وهي مصنوعة من الصوف
كاروك: المهد
