|
|
 |
 |
 |
 |
خان جغان
زاحم جهاد مطر
لاتكول هذا ياشاعر كتب هاي القصيده لا وزن لا قافيه وهيجي شعر ما نريده ولكم اني بعمري ما كاتب لا شعر ولا قصيده اني اكتب عن وطن اشوفه صاير مريده مصيبة شعب جنُه بالجدر صاير عصيده شردت النواطير والحراس وكُلمن عنه شال ايده وحاميها صار حراميها والجوارين ما شاء الله عليهم كلمن بزاوية من الوطن دَزْ عربيده وشبعنه هموم وسموم ودموم وعفنه السلة والعنب جزنه منه وكلنه ما نريده وانباك مَيه عينك عينك من خارج حدوده ودجلة لحكت بالفرات ومزارعنه ماتت شهيده وناس تسحب نفطه وغازه من داخل حدوده خل ياكلون مادام خالهم طيب والله يكثر من ثريده وناس تذبح بينه يوميه بالنار وبالحديده موت وذبح وانفجارات يوميه جديده الشعب هلك والله يا ناس ودم ينزف وريده اويلي عليك يا وطن سوده عليه يا وطن عمت عيني عليك يا وطن وانت صاير طريده بين وحوش ما ترحم كُلمن ينهش بيك من صفحه ويكول هذا اِلي و اريده واشبقه بيك يا وطن واشصفه منك يا وطن اشو صارت كُلمن وايده ولكم خان جغان هم مو هيجي كول اكثر ولا تخاف لو تزيده شعيط ومعيط وبلاع الخيط كُلمن يفتر بكيفه وياخذ اللي يريده شليلة وضايع راسه منو يلكيه ويعيده وجم وحده عراقيه مثل ام حميده ضلت وحيده الرجال انكتل عالهويه والولد مات بعبوه للابرياء جانت مصيده وجم واحد بالوطن اللي فقد وحيده وجم اهل وجم عائله جم بيت ما عنده شهيد او شهيده ؟؟ ربي شنو ذنب هذا الشعب ما يعيش عيشه سعيده والسياسي اللي انتخبناه كاعد براحته يقرا جريده وعالحاسوب يطَلع بريده ويدقق حسابه ورصيده شي يهمه بعد وصل للي يريده منصب وجاه وكرسي وامتيازات جديده والشعب يطبه طوب موجان هذا اللي يريده عمي البيه خير يعبي بالسكله ركي مثل عمنه السياسي واذا يكدر جْماله يزيده هم واحد يكول وين القافيه وين الوزن ولكم سوك هرج وكُلمن يبيع باللي يفيده
|
|
| |||||||||||||||||||||||||||||||||||||||||||||||||||||||||||||||||||||
|
© حقوق الطبع والنشر محفوظة لموقع بنت الرافدين Copyright © 2... bentalrafedain web site. All rights reserved. info@bentalrafedain.com | |||||||||||||||||||||||||||||||||||||||||||||||||||||||||||||||||||||||||
