شعر
أركب عالصعاب
حامد كعيد الجبوري
ليضهدك جرح أكبر ع الجروح
ونينك يفرح الشامت يسمعَه
وبهندس الخوف أيعشعش الليل
وعلى كُبر الظلام أتذبحه شمعه
راسك أرفعه أتنام النواطير
فولاذ الحديد أيهاب درعه
الشواطي من تذل يتعزَز الديم
تترَجه النده ومتـنول مُجعه
أنحر ع الفجر تـنزال الغيوم
وأسرج للمنايه الموت فزعه
لا تامن ذلـيل أيكصر أخطاك
ذليل أمنوج وتمساح دمعه
أبتر ذيلها ورد أردف الراس
لا أيغرك دمعها الدمع طبعه
أتعنه الصعاب أتذلها وتلين
الحسين الكون رجَّه أبدم أصبعه
صحيح أصبع وكع مالمته الكاع
شال الأرض وبأصبع يرفعه
****
أزرع بالصُبخ نخلات وورود
العينَه ع الزرع ميموت زرعه
ع الفطره البشر والخير مجبول
نعيش أبطيـبها ونرفض البدعه
من تطفح الغيره وينبـُض الغيض
عراقك ما يذّل محد يركعَه
تشب نار الضماير تعـتلي الروج
تـفز كل المكابر ميت ينعه
ألوّي أقيودك وعض النواجذ
وعلى أعيون الجبان أتضـيك وسعه
واكح للحقد بكلوب السباع
وكبُل ما يبتدي أبشرَه أصفعه
شك زيج الصبر وأفرش دواووين
وأتعنه الفرح والحزن شيعه
يذل العيط أذا حشم فسايل
والهادود كشَه ما توكعه
رضيع الغانمه يسرج الغيره
ونور الشمس بُركُع ما يكبعه
هيهات المراجل تعتـني أهدان
وجذبَه الكال عار أيسود ربعه
صاعود المجد ميلكط أنجوم
يجيب الشمس للدنيه أعله ضلعه
