نسمات
حليه *
حامد كعيد الجبوري
الحله غابَه أمن الشجر والياسمين
ومن تريد الطيب شمهَـا الحله
أيسير أعليها المسه نهر الفرات
تارس أشليله الورد والدهله
والنواعير أبحضن ميها تبات
أمديرمه الشفتين عين أمكحله
وبشواطيها الشمس تنزع الثوب
تغسل أزنود وتمشط كذله
وبليالي الصيف تـنزل للسطوح
للنجم تُحضن وتـُنصب كُله 1
والبلابل تلبس أثياب الصباح
أبريحة القداح تجمع سله
(أنعيج ماي) 2 ويلعَب أيضََّحك الماي
يركب الروج الفجر يتسله
والزواجل تعله وأسراب الحمام
أتطير حُره ولاجنحها أتشجله
وشارع العُشاك 3 يتـنطر حبيب
وصدر كل ورده تطوف النحله
والكمر ينزل على الحله ويمر
على الفقره وكل عكد يندله
سهر عدها الليل تعبان وينام
ترس عينه ولا ينام أبوجله
والمطر يغسل صبر كل السنين
أيجيبه للـيزعل يصالح خله
تفرش حديثات يم (بت الحسن)
خَد ترافه وعين كوز ونبله
أبهيده مجداف البلم ياكل الروج
أمدولبه الموجات صعبه وسهله
و(حسن نمج) 5 بالنهر ذب الشباج
ويرجع أبشكبان من مال الله
أبيوت طين وتضحك أبوجه القصور
والقصر ما فتَح بابه وهله
أبيوت مفتوحات للحب والأمان
أبساط ووجاغ ومضيف ودله
أطفال عكد (الشيخ والسرحه وبيات)
أندك على البيبان نلعب خَتله
زغار نلعب (دعبُل) ونطفر كُمر
(أجعاب) والشاطر يّرجع حله
الحله شجره أغصانها تعبد إلآه
واحد السجدت أله كل مله
أغصان جوري ورازقي وشبو وعطور
أبميها تروّي وبشجرها أتظله
الحله موطن علم منبع للعراق
الحله للينتسب ألها أتعله
(الحلي وأبن أدريس وأبناء النما
وأبن طاووس) 7 أبفضلها أتحله
الحله أم (الصفي) 8 وبحكها يكول
غبن عمره المانظرها أبمقله*
الحله مانامت ولاترضه أبهوان
ولا تمد أيد وتبايع ذله
مَرها جم (عاكف وحجاج ويزيد)
لاأثر ظل وذكرهم وله
جاورت (حيدر) وجيران (الحسين)
فراش للحبها وعدوها أتسله
***
* : القصيدة من بحر الرمل - (الموشح بالشعبي) – الصدر كامل التفعيلة
والعجز ينقص حرفاً – مجزوء الرمل – يُقره العروضيون ولا يستعمله الشعراء
الشعبيون.
1:قماش (ململ) يصنع منه غطاء يرفع من جوانبه الأربعة بأعواد ليحمي
النائم من (البق) وتسمى عند البعض الناموسية .
2: طير النورس
3: شارع يحاذي نهر الحلة في الجانب الصغير تظله الأشجار سمي هكذا لأحتضانه
الأحبة
4: مرقد أحد العلماء يقع على النهر مباشرة
5 :صياد سمك يعتاش بهذه المهنة
6: طرق في محلة الوردية
7 : مراقد علماء
8 : الشاعر صفي الدين الحلي الذي قال البيت*(من لم ترى الحلة الفيحاء
مقلته ، فأنه في أنقضاء العمر مغبون)
