الثوره نبت الوجع
 

عمرو السعودي
jadalasafa@googlegroups.com

علي كتف واحد جدع
الثروه صوت اعتراض
والشعب فعل مضاد
وبكره مش بالودع
وغيطنا كله جراد
وقالوا ده الي اتلدع
ينفخ في كل مراد
ويفصص الاغراض
لاجل الحصاد
يتجمع
فلاحه مصريه
والاسم حريه
بشعرها الاسمر
السجن يتمسمر
ويكسر الممنوع
يتفسر الموضوع
وكفانا م العسكر
احنا العيال السمر
فينا الجبان والحر
فين الي داق المر
وكتير ما يتأثر
ولا يأثر
فينا الي بيقصر
وبيسيبها بتغيبها
وبيفشر
فينا الي عايش
في غزوه الكفار
وفي غزوه الصناديق
فينا الي قال عالجدار
انه جدار العار
وفينا قال عالباني انه صديق
فينا الي لسه قلبه
دقه رقيق
فينا الي يتمني الحريق
والعراك
فينا الي بيقول ان العراق
حره
فينا الي فاكر
محمد الدره
فينا الي مابين
البينين
وفينا حزب الطيبين
الي بيتمنوا الربيع
والخير علي قد الجميع
واقفين علي باب الحسين
ودير ضحايا القدسين
شايفين بلدنا الطيبه
قريبه
من العنين
شايفنها فيها
ومنها دينها
لافيها داين
ولا مدينها
دستورها
سورها
مرجع يشورها
لحظه مانورها
يغيب
في عب الجاهلين
ماتلاقي عالم او اديب
وتتوه حقوق العاملين
بين غول وديب
وبين دواليب الورق
وفي اخر النص الطويل
ندعي الي المدعي
النضال
بناس وانفاسها الطوال
وبمصر مصر المشرقه
يدخل هواها الحر
ويعبي الرئه
ولا تبقي يوم
متفرقه
قولوا امين
يا كل من امن
بفعل المعشقه
موطني.