شعر
الكراسي
كاظم ال مبارك الوائلي
أخذوهة الكراســــــي مبارك الكم
وشرودا أولادكم لأمريكا والصين
وبنوا أقصوركم من مرمر وعاج
وباقي الناس خلهه أبيوتهم طــين
ومبروكة عليــــــــكم هالمناصب
والموكب او وعــــــاظ السلاطين
گبل زنگينــــــــكم حلـمه بصريفة
واليوم بفــــــــلل صرتوا وبساتين
وخيرّكُم گبل مــــــــنزلته الوجاغ
وهسة أسياد وبصــــــدر الدواوين
يا قانــــون هـــذا البيه تــشرعون؟
وشتعرفون انـــــــتوا من القوانين؟
بأول جلســــة خصصتوا الرواتب
وبالدولار وصـــــــــلت للملايــين
تسع نواب وثـــــلاثة الرئاســـــات
والدولة يمـــــــــثلها رئيــــــســـين
وكل ريس اله فـــــرقة حـــراسات
ولوگية بمراتـــــــب مستـــــشارين
وما شايف بلــــــــــد وبنـصه أقليم
وبالدستور چن أحـــــــــــنة دولتين
حيل أويه الشعب والله وألف حــيل
ما تاب وتعلم كـــــــل هالســـــنين
بعد ما گعداكـــــــم عالكــــــراسي
فتح عينيه ولگه شلــــة مجانــــــين
تره صوچ الشعب اللي أنتـــــخبكم
لا والله انتم ما موصوچـــــــــــــين
