"جدم الشعب "

هاشم صياح الحجامي

يا الما وفيت وي الشعب ...
يالمُنتخب ...ينرادلك ساعة لهب ...
ينرادلك جمعة غضب
صاير عوج من راسك لحد الچعب
ما تنعدل ...
ما تنعدل لو أحطك أبمفصل گصب ...
اصحه اعله وكتك يا ولد ... لاتحترگ
لا تحترگ وانت حطب
حسبالك أبجنحك طرت
وانه ألرفعتك بصبعي
أبساع تنكرت ... ياللعجب .!
حسبالك يدوم العسل ...؟
ما سامع بهذا المثل ...؟
يا من نهب ...يا من سلب
يامن على الخشبه انصلب
عينك على الحطلك جنح ودله سهم
مو بس ألك سلة العنب
طك ظلعك من اچل اللحم
لا تنتخم وبموتك أتصير السبب
گبلك اجو ...هم چذبوا ..
هم لفلفوا ..هم جمعوا فضة وذهب
تلگالهم هسه ذكر
تلگالهم هسه اسم
...تلگالهم اسم ولقب
صاروا خفت ... حرگتهم أسنون الوكت
داستهم اجدام الشعب ..
لاتنسحگ ...ما ينحمل جدم الشعب
ما ينحمل ... ما ينحمل ...